Simuthulela ingwani besimuwahlele nezandla ngekariso mraro ayenza enarheni yekhethu. Imbokodo enetjhisakalo nethando lemigwalo. Imisebenzi yaka gogo iyaziwa mhlaba jekelele, ilutjha elisakhulako licalele kuya. Elinye selithomile ukumunya ilwazi kuye.
Imisebenzi yaka gogo iyahlonipheka, inesithunzi noburhwari bokusebenzisa isiphiwo sezandla. Kunjaloke, wambeswa iziqu zobudorhodere eUniversity of Johannesburg ukumukhuthaza bona atjhitjhinge ayephambile ngomsebenzi omuhle. Kilomkhakha waArt ugogo ngumma wesikhethu wokuthoma owagwala iBMW 521 ngomnyaka ka 1991. Wahlanganyela nomvumi owathumba I Grammy award kanye ne ambassador yeBelvedere Red uJohn Legend. Imigwalo yakhe ivezwe phezukwamabhodlelo ngehloso yokulwisana nentumbantonga. Imisebenzi Kagogo minengi khulu, ngingayitjho belirhwalale.
Njengesibonelo esihle, ugogo sele afundise nelutjha ukugwala. Ukugwala mrabhu ongafiko usuka ekadeni nanje usese namandla. UMagareth Bakwateleni Jiyana ngomunye wabagwali abasathuthukako. Umdlali wedrama yakamabona kude, inengi limazela ku Ikani eyayidlala ku SABC 1, usebebenzisa izandla ukuziphilisa. Uyagwala be aphothele. Izembhatho nokhunye okuphothelwako kubonakala kuthandwa babantu abanengi tle! Irhwebo lakhe liyakhula kancani kancani, mvanje sibonile eenkumbeni zokuthintana unaJiyana umbathise omunye wabosaziwako Dj Fresh, ka ti wakhe wambathisa nodade obekadlala ku Zone 14 ibizo lakhe ngu Relebogile Mabotja lokha nakasekhambeni lakhe le New York City enarheni  ye America, lokho kwenza isiNdebele sithuthuke sibe limbatho elivunulwa iphasi loke mazombe.
UThando Mahlangu no Skhumba Masango banebhudango linye, lokuthuthukisa ilimi namasiko wesikhethu. Ubabona nangembatho ukuthu bazibetha isifuba ngesikho labo. Bobabili babambisene ku Ingwani creation(IC), Bagwala iingwani ezihle khulu begodu irhwebo lidosa kamnandi, esele kwenzeka mva nje umvumi ongu Dj Sbu wenza amalungiselelo we album yakhe ayigadangisa buncopha, nalapho umsebenzi wamasokana la ubonakele lokha uDj Sbu naka veza umgadangiso mbono wabo base kumbeni yokugadangisa, kunesokana ebegade limbethe Ingwani Creation, lokho kusebeka emtarini nje pahla yembuzi bona imigwalo yesiNdebele sele ikhamba kude iphembetha njengomlilo otjhisa umango, kazi abeswaba bobabili bakhulele ngaphasi kwefundiso ehle yaka gogo Dr Esther Mahlangu nabo.
Sinabo anengi tle abagwali besiNdebele ekorweni yezobukghwari, okuhle kukobana base batjha lokho kukhombisa ukuthuthuka nokungafeleli kwesiko nethando lesikhethu. Udade Lumka Sikhosana naye ngomunye ogwala izembatho begodu umsebenzakhe muhle khulu kwamambala sele khewambathisa isiqhema se Joyous celebration, wambithisa imitjhado ehlukahlukeneko.
UThandeka Smomoza Ntuli ngudade osemncani ongaphasi kweminyaka ematjhumi amathathu, kodwana umsebenze awenzako ngokuphothela mkhulu kude kunaye naNtuli uphothela amanyathelo wabodade neembhegana ezincani ngaphasi kwe kampani yakhe i Thandeka Luxurious Touch (TLT) basibonelo esihle khuku kwanga soke singafunda kibo besibasekele.
Nomsa Masanabo uhlala KwaMhlanga uyaphothel, uyagwala begodu uluka nemiseme okuyinto esingakayijayeli yenziwa babantu abatjha, kodwana lo wakwa Masanabo uphuma phambili ngokuluka umseme nokuyinto esebenza khulu esitjhabeni samaNdebele lokha nakwenziwa inothiso begodu umseme yinto amaNdebele ayikhonzileko umuntu nakahlezi ngaphasi komuthi kutjhisa azipholele basebenzisa wona ukuhlala.
ISewula Afrika yoke iyazikhakhazisa ngawe gogo. Ingathi Usomnini angakwandisela amalanga wokuphila, akuphe nokuhlakanipha okungapheliko. Indlela ibuzwa kwabaphambili, thina yethu siyibuza kuwe Mahlangu. Uyikeresi ekhanyisela isitjhaba ngawe inarha iyathuthuka nendlela eyaphambili iyabonakala. Siyathokoza gogo.
Umtloli: Bridgette Nokuthula Sikhosana
Umhlaziyi: Ngemani Sibusiso Mahlangu
