Umthetho wamalungelo eSewula Afrika uvumela, bewupha imvumo yokobana nawuneminyaka ematjhumi nobunane (18) uthome ukuvow’da. Kulilungelo kukodwa lokho. Ngas’khathi kuba nemibuzo ebuzwako bonyana ukuvow’da kuyawenza umehluko na. Ungabilayeli ipendulo yalapho uyeza.
Ikuvow’da kukupha ithuba lokuba yingcenye yalaba abathatha iinquntu ezifakahlangana ipilwakho nekusasa lakho eSewula Afrika. Nawungavow’di abanye abantu bazokuthathela iinqutwezo.
Yeke kufanele uvow’de ngombana emnyakeni engaphezu kwamatjhumi amathathu (30 years) edlulileko abantu bekhethu bebangavumeleki bonyana bayokuvow’da bazithathele zabo iinquntu ngalokhu abakufunako nabakufisako ngepilwabo. Bakulwela lokho kwatjhuguluka, benzela wena bona utjhaphuluke.
Amavow’du anemiphumela. Imiphumela yawo ikabili. Nawuvow’dako uzwakalisa iphimbo lakho, kodwana nawungavow’di awukwazi ukuba nephimbo, uzibonakalise, unghonghoyile nangedlela ufuna ngayo sele uthathelwa iinquntu ngeyakho ipilo.
Ukungavow’di kwenza bonyana uhlale la uhlezi khona ungabi netjhuguluko nelincani olibonako, uzokuhlala, uphile ngendlela abantu abavow’dileko bafuna ngayo, ingasi ngendlela wena ufuna ukuphila ngayo. Kanti-ke Nawuvow’dako ubanamandla wokutjho bonyana ufuna izinto zenziwe bunjani, amandlakho asekuvow’deni.
Ikululeko iyakutlhoga begodu ukuvow’da kukupha ithuba letjhugululo leli wena olifunako nolifisako. Ikululeko yona iberega nakunabantu abazibandakanyako. Nangabe bewucabanga bonyana uzakutshwila umnyaka lo ungayokuvow’da, cabangisisa. Iminyaka emihlanu minengi khulu bonyana kungahlala neenqutu owenzelwe zona ngabanye abantu.
Ilutjha lanamhlanjesi lazingcono. Ithathe njengalokha uberegisa umaliledinini munye iminyaka emihlanu yoke, oloku urhuluphela ukuthola omunye umaliledinini kodwana ungavumeleki bonyana uyitjhugulule ngaphambi kobana iminyaka leyo iphele. Ye-ke yenza isiqinisekiso sokubona uyeentetjhini zokuvow’da uyokuzwakalisa lakho iphimbo nawe.
Ungakhohlwa ukuphatha amazisi wakho (ID) lokha nawuyokuvow’da. Iphimbo lakho liqakathekile
